Ita-boot haree ona Lalehan? Karik ita-boot esperiénsia ona besik mate no lori ona ba Lalehan? Iha sasin barak no mós livru sira ne’ebé hakerek kona-ba esperiénsia sira hosi sira ne’ebé ba ona Lalehan. Saida maka sira hatete ba ita-boot loos ka lae? Lalehan ne’e oinsá loloos?

Mai ita buka resposta husi buat neʼebé hakerek ona iha Bíblia laran.

Lalehan mak fatin ka lokalizasaun ida

Lalehan mak fatin ida ne’ebé sai destinasaun ba ema hotu ne’ebé fiar iha Jezús Kristu nu’udar Na’i no Maksoin.
Jesus mós bolu fatin neʼe “Haʼu-nia Aman nia Uma”.
Jesus dehan iha João 14:1-2, “Keta husik imi nia fuan laran taridu; fiar iha Maromak, fiar mós iha Ha’u. Iha Ha’u Aman nia uma iha fatin barak. Se la’ós nune’e, Ha’u sei hatete ba imi. Tanba Ha’u sei ba iha ne’ebá atu prepara fatin ba imi.”

Saida maka ema sei halo iha Lalehan? Sei iha han no hemu, no sei iha relasaun kaben nian?

Iha ne’e maka faktu sira ne’ebé maka hakerek iha Bíblia:
1. Apokalipse 7:14-17 konta fali vizaun ida kona-ba Apóstolu João iha Lalehan. Iha Maromak nia kadunan, ho Bibi-Oan iha klaran, no povu ida ne’ebé serbí, hananu hahi’i no adora Maromak.
2. Nia hateten katak iha Lalehan sei laiha tan hamlaha ka hamrook.
3. Iha Lalehan mós sei la iha tan tristeza, tanba “Maromak sei hamaran sira nia matan-been”.

4. Mezmu Jesus deklara katak laiha ona relasaun kazamentu iha moris hafoin mate, “Jesus hatán no dehan ba sira, “Mundu ne’e nia oan sira kaben no kaben, maibé sira ne’ebé konsidera merese atu simu mundu ne’ebá no moris-hi’as hosi mate sira la kaben no la fó ba kaben. Tanba sira labele mate tan; sira hanesan anju sira, no Maromak nia oan sira, tanba sira hetan moris-hiʼas.” ( Lucas 20:34-26 )

Bazeia ba esplikasaun iha leten, moris iha Lalehan la preokupa ona ho nesesidade fíziku hanesan hahán no hemu no kazamentu. No mós la preokupa ho ita-nia emosaun, tristeza, ka hirus, tanba ita-nia fuan sira foka ba Na’i Jezús Kristu, Bibi-Oan, atu ita moris iha ksolok divina.

 

Dalan ba Lalehan

Iha pasajen ne’ebé Jezús deklara katak Nia sei prepara fatin ida iha Aman nia uma, Tomé husu dalan ba Lalehan mak saida.
Ita-boot iha pergunta hanesan? Oinsá ha’u, ema sala-na’in ida, bele hetan fatin iha Lalehan?
Ne’e mak Jesus nia resposta: “Ha’u mak dalan, lia-loos no moris. La iha ema ida mak bele mai Aman, se la liu husi Ha’u. Se imi hatene Ha’u, imi sei hatene mós Ha’u Aman. Husi ohin ba oin imi hatene Nia no haré ona Nia”. ( Joao 14:6-7)
Jezús maka dalan úniku, lia-loos, no moris; liuhusi Nia de’it maka ita bele hetan moris rohan-laek.

Oinsá? Hodi fiar katak Jezús maka Na’i no Maksoin, no katak Nia mate no moris hi’as atu hamoos umanidade nia sala sira.

“Se ó dehan ho ó nia ibun katak Jesus mak Na’i, no fiar iha ó nia fuan katak Maromak halo Nia moris hi’as housi mate, ó sei hetan salvação, basá ho fuan ema fiar no hetan justiça, no ho ibun ema fó sai no hetan salvação.” ( Roma 10:9-10 )

Sira ne’ebé fiar iha Jesus Kristu mak ema foun, ne’ebé moris hi’as iha Espíritu Santu no sai Maromak nia oan, hanesan hakerek iha João 1:12, “Maibé sira hotu ne’ebé simu Nia, Nia haraik kbiit atu sai Maromak nia oan, ba sira ne’ebé fiar iha Nia naran;” ida

Ita-boot hakarak hatene Jezús Kristu, no hetan ita-boot nia dalan ba Lalehan?

Akompaña ami nia programa Dalan Ba Lalehan 

Se ita-boot iha pergunta sira kona-ba Lalehan no oinsá Bíblia hatán ba sira, kontaktu ami. WA +67073888777 / email awrtimorleste@adventist.tl